India / Business
કૉલ ડ્રોપના કૌભાંડથી કરોડો કમાતી ટેલિકૉમ કંપનીઓ પર TRAIની તવાઇ...માપદંડો ન સંતોષે તો 5 લાખ રૂપિયા દંડ !
02:01 PM on 19th August, 2017

ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI)એ કૉલ ડ્રોપ અંગેના નિયમો વધુ કડક બનાવ્યા છે અને ટેલિકૉમ કંપનીઓને કહ્યું છે કે,ટેલિકૉમ ધોરણોને સંતોષવામાં નહીં આવે તો ઓછામાં ઓછો 5 લાખ રૂપિયા દંડ કરવામાં આવશે.

TRAIએ કહ્યું છે કે,સેવા આપનાર ઓપરેટર નવા શરૂ કરવામાં આવેલા કૉલ ડ્રોપ દરના ધોરણ સુધી પહોંચવામાં અસફળ રહેશે તો તેમના વિરૂદ્ધ કાર્યવાહી કરવામાં આવશે અને આ કાર્યવાહી હેઠળ દંડ ફટકારવામાં આવશે.દંડની રકમ એ આધારે નક્કી કરાશે કે,જે તે કંપની નિશ્ચિત ધોરણોથી કેટલી દૂર છે

નિશ્ચિત ધોરણો પુરા ન કરવામાં આવે તો પ્રત્યેક માપદંડ માટે 5 લાખ રૂપિયાનો દંડ કરવામાં આવશે.કોઇ કંપની નિશ્ચિત ધોરણો સંતોષવામાં સતત 6 મહિના સુધી અસફળ રહેશે તો દંડની રકમ દોઢ ગણી થઇ જશે અને તે પછી પણ સુધારો નહીં દેખાય તો દંડની રકમ બેવડી કરાશે.

 

TRAIએ કહ્યું કે,સેવાની ગુણવત્તા માટેના સુધારેલા નિયમન 1 ઓકટોબરથી લાગુ થશે.આ નવા નિયમન મુજબ કોઇપણ ટેલિકૉમ સર્કલમાં 90 ટકા મોબાઇલ સાઇટ,90 ટકા સમય સુધી અને 98 ટકા કૉલ્સ સરળ રીતે ચલાવવા સક્ષમ હોવી જોઇએ.મતલબ કે કુલ કૉલ્સના બે ટકાથી વધુ કૉલ્સ ડ્રોપ ન થવા જોઇએ.કોઇપણ ખરાબ સ્થિતિમાં અથવા દિવસના વ્યસ્ત સમય દરમિયાન ટેલિકોમ સર્કલમાં 90 ટકા મોબાઇલ ટાવર પર કૉલ ડ્રોપનો દર 3 ટકાથી વધુ ન હોવો જોઇએ.

કૉલ ડ્રોપમાંથી કરોડો રૂપિયા કમાતી ટેલિકૉમ કંપનીઓને 5 લાખ રૂપિયા દંડ ભરવો તો રમત વાત છે...!

 
 

Read Also

 
Related News