India / gujarath
ક્રોસ વોટિંગ કરનાર બે ધારાસભ્યોના મત રદ્દ કરવા ચૂંટણી પંચ સમક્ષ કોંગ્રેસની માગણી
06:19 PM on 08th August, 2017

ગુજરાતની રાજયસભાની ત્રણ બેઠકોનું મતદાન પુરું થયું છે અને પરિણામ આવવાની મિનિટો જ બાકી છે અને કોંગ્રેસે ચૂંટણી પંચ સમક્ષ માગણી કરી છે કે,તેના બે ધારાસભ્યો કે,જેણે ભાજપને મત આપ્યા છે તે મત રદ્દ કરવા.

કોંગ્રેસનો દાવો છે કે,તેના બે ધારાસભ્યો કે જેમણે ક્રોસ વોટિંગ કર્યું તેમણે તેમના બેલેટ પેપર ભાજપના પ્રિસાઇડિંગ ઓફિસરને બતાવ્યા. આ બન્ને ધારાસભ્યો છે ભોળાભાઇ ગોહિલ અને રાઘવજી પટેલ.જો ચૂંટણીપંચ આ બન્ને ધારાસભ્યોના મત રદ્દ કરી દે તો ભાજપનો બરાબર જામેલો ખેલ ધૂળધાણી થવાની શકયતા છે.

 

કોંગ્રેસના નેતા શક્તિસિંહ ગોહિલે કહ્યું કે,તેમના પક્ષના આ બન્ને ધારાસભ્યોએ અમિત શાહને બેલેટ પેપર બતાવીને મત આપ્યો.તેમણે કહ્યું કે,કોઇ એક પાર્ટીનો ધારાસભ્ય બીજી પાર્ટીના એજન્ટને બેલેટ પેપર બતાવે તો તેનો મત રદ્દ થાય છે.

હવે ચૂંટણી પંચ મતદાનનો વીડિયો જોશે અને વીડિયો જોયા પછી નિર્ણય કરશે કે શું કરવું અને તે પછી જ પરિણામ જાહેર કરાશે.

દરમિયાનમાં વધુ એક રહસ્ય જનતા દળ (યુ)ના છોટુ વસાવાએ ઉભું કર્યું છે.વસાવાએ દાવાપૂર્વક કહ્યું કે,તેણે અહમદ પટેલને મત આપ્યો છે જ્યારે કે,જનતા દળ (યુ)ના વરિષ્ઠ નેતા કે સી ત્યાગીએ કહ્યું કે,છોટુ વસાવાએ ભાજપના ઉમેદવારને મત આપ્યો છે.

 
 

Read Also

 
Related News